Iò mi dumannu: ma ‘sta minchia ‘i terra
fatta d’imbrogghi, sciarri e sempri ‘n guerra
cu la misi a girari ‘ntornu ‘o suli,
china di cristiani, armali e muli?

L’unica cosa bella ‘i viriri
sunnu ‘i pianti, l’acidduzzi e i ciuri;
beddu lu mari quann’è sirenu
ma di luntanu, quannu passa ‘u trenu.

L’amuri e la bontà, tu, chi mi dici,
unn’è ca sunnu cchiù li veri amici,
‘a genti, chidda vera, chidda onesta?
T’u po’ scurdari, levitillu d’a testa.

Oggi si joca a futtiri ‘u cumpagnu,
l’amicu ch’accarizzi ti duna ‘n’mpugnu,
‘u beni chi tu fai ‘n vali nenti
picchì dopu ‘n’anticchia ti nni penti.

Li stiddi chi tu viri ‘nta lu cielu
ddà ssupra, ‘mpiccicati ‘nta ddu’ velu
sunnu lanterni, luci di Natali
ristàti ‘nta lu tempu, tali e quali.

‘A terra è ‘nu prisepi di tant’anni,
è ‘nu prisepi ‘mmenzu, ranni ranni;
i luci cci misi ‘nu Scinziatu
chi ppoi muriu e ‘u lassau ‘ddumatu.