Amici nun si nasci, si diventa…
‘a stima, ‘u rispettu e ‘a fratillanza
nun sunnu cosi ch’unu si l’inventa
puru picchì ‘n’cinn’è granni abbunnanza.

‘A stima nasci comu ‘na piantina
ca voli sulu acqua e la friscura
e quannu spunta ‘u suli ogni matina
‘a criscita è custanti e cchiù sicura.

Rispettu e fratillanza su’ valuri
ca vannu mantinuti in società;
su’ cosi ca ti nesciunu d’u cori
e chi si dannu interi e no a mità.

È chista l’amicizia cchiù sincera
e ch’è cchiù forti puru di l’amuri,
è chista l’amicizia chidda vera
ca tu ti porti sempri dintr’a u cori.

L’amuri c’u tempu si cunsuma
e si cunsuma comu nu luminu,
‘a vera amicizia nun si sfuma
e si la strinci l’hai sempri vicinu.