‘Ssittatu ‘nta ‘na seggia cu’ cuscinu,
sulu, ‘nta la viranda d’u giardinu
mi passu ‘u tempu a taliari ancora
a cchiddi ca mi passanu ddà ffora
e finu a quannu pozzu fari chistu
haju di ringrazziarilu ‘o me’ Cristu.

Certu canciaru i tempi di ‘na vota,
ma ‘a vita gira sempri comu ‘a rota
e puru ca pussedi li dinari
‘stu cupirtuni nun lu po’ canciari
e quannu si cunsuma lu spissuri
ti cerchi d’appujari a lu Signuri.

Nun pozzu fari nenti, è la natura,
passata la chiarìa sempr’ascura,
ti resta sulamenti ‘nta lu cori
‘u desideriu granni di campari
e chiddu ca chi manu ‘n’po’ affirrari
cull’occhi sulu ti nni po’ ‘rricriari.