La donna pi’ natura è sapurita,
bedda di modi e bedda di risata
cu lu so’ fari pari ca t’invita
a farisi cantari a sirinata.

Ma tuttu ‘nta la vita ha ‘na misura,
c’è sempri quacchi cosa ca nni manca
c’è ccu la forza l’havi pi’ natura
e ccu pi’ so’ natura nasci stanca.

Nudda ‘mpurtanza havi la statura
né lu culuri di li so’ capiddi,
la donna va vardata quannu è nura,
quannu si pò ammirari la so’ peddi.

Però nun basta sulu l’apparenza,
ci voli ca funziona ‘u ciriveddu,
ci voli aviri puru la crianza
e puru ‘u bruttu ti diventa beddu.

L’unica cosa di tenir’a menti
è ‘u difettu d’essiri ‘mbrugghiuna,
vardacci ‘a vucca, vardacci li denti
basta ch’idda nun havi li scagghiuna.

Pigghialu sempri chistu ‘nsignamentu,
‘a fimmina ca cerca lu curtigghiu
megghiu mittìlla dintr’a ‘nu cunventu
e starici luntanu menzu migghiu.