Chiuri, ch’annùnca tràsinu i jaddìni,
pigghia la scupa e pulizia la scala,
fannu sempri schifu li puddicìni;
poi la munnizza levala ca’ pala.

E tu, Cuncetta, lava dda cammisa
ca poi to’ patri mi la cerca a mmia;
e tu, Filippu, nesci a fari ‘a spisa:
ci voli nenti ca iddu si siddìa.

Sùsiti Annuzza e cònsati lu lettu,
vidi si bugghi l’acqua ‘nta pignata,
pigghia lu pani, pigghia chiddu ruttu
e mettici a cipudda ‘nta ‘nsalata.

Dicci a la nonna mi si metti ‘u sciallu
ca pigghia friddu e poi ci veni a tussi,
si metti sutta lu magghiuni giallu
e li cuasetti ‘i lana, chiddi russi.

‘Na vota funzionava ‘i stà manera,
tra matri e figghi c’era gran rispettu;
chiddu ca oggi c’è, tannu nun c’era,
c’era armunia, c’era sulu affettu.

Pàrunu cosi vecchi, cosi antichi
a cuntàrili parunu fuddìa,
pàrunu cunti p’i carusi nichi,
ma era propriu accussì, crirìti a mmia.