Quannu si dici: «chiddu è ‘n animali»
si pensa ca si parla d’i cristiani,
ti veni ‘nta la menti lu maiali,
‘n ti veni di pinzari sulu ‘e cani.

È ‘n animali l’ommu scinziatu,
è ‘n animali l’ommu senza cori,
è veru amicu ‘u cani affizziunatu
è veru amicu ca ti duna amuri.

Provaci a dari ‘n pugnu a ‘nu cristianu,
provaci a dariccillu pi’ babbiari;
stanni sicuru ca t’allonga ‘i manu
e nesci l’ugna ca ti vo’ scignari.

Lu cani inveci, poviru animali,
la cura ‘mmenz’e jammi iddu s’azzicca
e si comporta sempri tali e quali:
prima t’abbaia e poi iddu t’allicca.