Ti pari nenti a lu tempu d’oggi
ca scacci ‘nu buttuni ‘nt’a lu muru
e ‘nt’a la notti spunta jornu chiaru?
‘Na lampada s’appiccia e poi si stuta
senza cannila e fumu di tizzuni.
E chi nni dici tu, caru Ninuzzu,
ca ‘nt’a cucina appoj ‘na pignata
supra ‘na piasctra senza focu sutta
e ‘na fiammella azzurra e culurata
ti coci la pietanza e la frittata?
Angelica… li tempi su’ canciati,
passati su’ li modi di ‘na vota…
c’u gas, c’u pitroliu e c’u mitanu
oggi li navi, i razzi e l’aruplani
a cchi su’ ccà a cchi su’ già luntani.
Diciva l’atru jornu Carmilina…
so’ mamma cu’ la bambola jucava,
ma senza sfiziu, senza puisia,
a stari sempri muta s’annuiava,
raru ‘nu jornu ch’idda nun chiancìa.
Certo la scienza ha fatto passi avanti:
tu parli ccà e n’atru a Roma senti,
cu’ steriu, cu’ la radiu e la tivvù
tuttu si sapi chiddu ca succeri,
chiddu ca fannu l’atri e chi fa’ tu.
Chistu è progressu, car’amicu miu,
la vita è prujttata ‘nt’o futuru,
la forza ca sprigiona l’energia
quannu ti pari ca non faci nenti
ti cancia l’abitudini e l’ambienti.
Spiramu ca nni lassanu campari
e chi la scienza ‘un nni porta ddannu,
spiramu chi di oggi ‘a società
cu l’esperienza e cu la so’ cultura
truvassi ‘a paci e la serenità.